DAVAO CITY – Patay ang usa ka Top drug personality human nga mipakita ug pagsukol atol sa gilusad nga drug buy bust operation sa mga sakop sa Sta. Ana Police station sa pagpanguna ni Police chief Inspector Mike Uyangguren.
Una ng gilusad ang drug buy-bust operation sa Gotamco, Agdao ning dakbayan diin target nila ang pagsikop sa suspek nga si Cristobal Talara alyas Obal, 35 anyos, minyo, walay trabaho, ug residente sa nahisgutan nga lugar.
Gikanayong dihang gitunol sa suspek ang ginadili nga droga sa nagpaka-aron ingnon nga buyer nagpaila kini nga sakop sa otoridad apan inay nga motahan misulay sumala pa pagbunlot sa iyang .38 caliber revolver ang suspek ug gipusil ang nahisgutan nga police officer sulod sa tulo ka higayon apan wala kini naka-igo ug nabalsan sa otoridad nga maoy hinungdan nga nakahi-agom si Talara ug daghanang samad pinusilan sa iyang lawas.
Gisulayan pa pagdala ang nahisgutan sa Southern Philippines Medical Center apan gideklara kining dead on arrival sa doktor.
Samtang anaa sa ospital, narekober pa gikan sa suspek ang 24 ka mga tag-as nga pakete sa ginadili nga droga ingon man ang P500.00 nga buy bust money.
Narekober sab sa otoridad sa crime scene ang usa ka.38 revolver nga gi-undan sa lima ka mga buhing bala ingon man mga basiyo sa 9mm. Gikanayong ang kinatibuk-ang drug evidence ang anaa sa 2 ka gramos nga adunay street value nga P25,000 pesos.
Tanan nga mga ebidensiya nga nahipus sa otoridad ang anaa na karon sa kustodiya sa kapulisan alang sa tukma nga disposisyon. Nagpahigayon na sab karon ug otopsiya ang otoridad sa patay’ng lawas sa suspetsado.
