DAVAO CITY – Patay ang usa ka gikonsidera usab nga Top 1 City Level High Value Individual human nga misukol sa mga otoridad atol sa usa ka drug operation sa Barangay 21-C, Davao City, kagahapon sa kaadlawon.
Giila sa Sta. Ana Police ang napatay nga suspek na si Victor Gonzales Barrera, alyas “Balong”, hamtung, ug nagpuyo sa Purok 8-A, Riverbed, Barangay 21-C, Davao City.
Target sa maong operasyon ang nahisgutang suspek.
Apan nanlaban ang dinakpan atol sa pagkasikop kaniya pinaagi sa pagpusil sa usa sa mga sakop sa pulis, apan wala naigo ug igo na lamang sa pagbalos ang iyang kaubanan nga nakapatay sa suspek.
Nakahiagum og samad pinusilan sa kalawasan ang maong suspek hinungdan nga gidala siya pagdali sa Southern Philippines Medical Center, apan nakabsan gihapon sa iyahang kinabuhi.
Na-rekober ang gigamit sa suspek nga usa ka calibre .38 nga pistola, usa ka rectangular size nga pakete nga dunay sulod nga gituuhang shabu nga dunay gibug-aton nga 7 ka gramos nga nagkantidad og P112,000.00, buy bust money, ug mga drug paraphernalia.
Nasayran pud nga ang suspek nalambigit na sa pipila ka insidente sa tulis ug akyat bahay diri sa syudad.
via || Bombo LJF
