DAVAO CITY – Sikop ang Top 8 drug personality sa Davao Oriental atol sa gipahigayong hiniusang buy-bust operation sa mga sakop sa Philippine Drug Enforcement Agency Regional Office XI, Davao Oriental Provincial Office, Police Regional Office XI Regional Intelligence Unit, Davao Oriental Police Provincial Office, Provincial Drug Enforcement Unit ug Lupon Municipal Police Station sa Purok Malinawon 1, Barangay Ilangay, Lupon sa nasangpit nga probinsya.
Target sa maong operasyon ang usa ka Arjie Bareja, alyas Arjay, 35 anyos, minyo, Provincial Target Listed Drug Personality Number 8 ug residente sa nasangpit nga lugar.
Malampuson kining nasikop human nga namaligya og usa ka pakete sa gitouhang shabu nga nagkantidad og P1,000 ngadto sa PDEA Agent nga nagpaka-aron-ingnong buyer.
Nakumpiska atol sa operasyon ang mga drug paraphernalia, buy-bust marked money ug ang motorsiklo nga gigamit niini sa maong iligal nga aktibidad.
Pasakaan ang dinakpan og kasong kalapasan sa Section 5 ug Section 12 sa Republic Act 9165 o Comprehensive Dangerous Drugs Act of 2002.
BY BOMBO ALLIANE SILAO
