DAVAO CITY – Gihatagan og Hero’s Welcome ang Tokyo 2020 Olympic Silver Medalist nga si Nesthy Alcayde Petecio sa iyang pag-uli sa iyang hometown sa lungsod sa Santa Cruz, Davao del Sur.
Bisan pa man adunay mga COVID-19 restriction nga ginapatuman ang lungsod, mainiton gihapong gisugat sa mga taga-Santa Cruz ang garbo sa ilang lungsod.
Nagsugod sa Barangay Inawayan ang caravan ug nahuman sa Barangay Bato.
Gipangunahan mismo kini sa Santa Cruz LGU. Human sa parada, mitambong ang Boxing Champ sa Municipal Training Center diin gipahigayon ang usa ka mubo nga programa isip pag-ila sa iyang kadaugan sa Olimpyada.
Gihatagan siya og 500,000 pesos nga cash incentives sa ilang Alcalde sa Santa Cruz nga si Engr. Jaime Lao, Jr. ug ni Municipal Treasurer Julius Caesar Pejo.
Gihatagan usab siya og pagdungog sa Santa Cruz Municipal Council pinaagi sa Resolution of Commendation sa ilang LGU pinaagi sa Sangguniang Bayan Resolution.
Unyang alas 7 sa buntag usab, mutambong si Nesthy Petecio sa pagpasidungog kaniya sa Davao del Sur Provincial Government didto sa kapitolyo sa Dakbayan sa Digos.
Una pa man niini, nag-courtesy call si Petecio sa buhatan sa Philippine Coast Guard sa Sasa ning Dakbayan sa Davao atol sa iyang pag-abot.
