DAVAO CITY – Atol sa ikatulong hugna sa hinabing pangkalinaw tali sa GRPH-NDFP nanghinaut ang grupo sa mga mag-uuma nga unta mahatagan na ug pagtagad ang ilang mga mulo partikular na ang tinuod nga reporma sa yuta.
Matud pa kang Lito Lao, Sec. General sa Kilusang Magbubukid ng Plipinas (KMU) ug tigpamaba sa Manggagawa sa Agrikultura, nga ang ilang gipahigayon karon nga kampuhan adunat tema nga bugas, yuta ug hustisya diin pagpakita sumala pa kini ug suporta sa nagpadayon nga peace talks nga gipahigayon sa Italy.
Dugang ni Lao nga nakamugna na karon ug napulo ka balaud ang nasud kalabot sa pangyuta apan dyutay lamang nga mga mag-uuma ang makaangkon tungod kay daghanan sumala pa ug himuon nga bikil o teknikalidad aron nga tangtangon kini isip mga benepisiyaryo.
Dungan sa ilang gipahigayon nga kampuhan, naglaom ang nahisgutan nga unta hingpit na nga maangkon sa mga mag-uuma ang mga Agricultural land ilabi na sa mga tinuod nga nagtikad niini inay nga ihatag sa mga dili tinuod nga mga benipisiyaryo o sa mga agalon nga yutaan.
