Posibleng ideklara na karong katapusan sa Marso ang pagsugod sa ting-init sa Pilipinas, sumala sa Philippine Atmospheric, Geophysical and Astronomical Services Administration (PAGASA), samtang hinay na usab ang amihan o northeast monsoon.
Gipahayag sa state weather bureau nga mihinay na ang bugnaw nga hangin sa amihan, usa ka timailhan nga nagpadulong na ang init ug uga nga panahon.
Posible usab nga ideklara sa sunod nga semana ang opisyal nga pagtapos sa amihan ug pagsugod sa dry season.
Sa pagkakaron, duha ka weather system ang nakahatod ug epekto sa nasud: ang amihan ug ang easterlies, ang init nga hangin nga gikan sa Dagat Pasipiko.
Gilauman nga mas init ang panahon sa umaabot nga mga adlaw ug semana.
Bisan pa niini, adunay mga lugar sama sa Caraga ug habagatang bahin sa Leyte nga makasinati gihapon og ulan tungod sa cloud bands.
Samtang ang kadaghanan sa nasud nakasinati og hayag ug malinawon ang panahon.
