DAVAO CITY – Wala’y dautan nga record ang Special CAFGU Active Auxiliary SCAA nga gipasakaan ug kaso human nakuha sa posisyon niini ang pick-up sa gipusil-patay nga magpapatigayon Eduardo Tan.
Kini ang gikompirma sa Task Force Davao, diin sumala pa kang Col. Randolf Cabangbang (OIC) Commander sa TFDavao nga nadistino sa intelligence unit si SCAA Melvin Namla ug nakita nga maayo ang performance niini sa trabaho.
Una nang gi-angkon ni Col. Cabangbang nga dili gayud kini igo nga basihan aron nga masulti nga wala kini’y kalabotan sa illegal nga binuhatan sa gawas sa iyang trabaho.
Gisalig na lamang sa Task Force Davao ngadto sa Sasa Police ang imbestigasyon ug sa pagduso ug kaso. Gipasalig ni Col. Cabangbang nga andam ang TFD nga makig-alayon sa kapolisan.
Nasayran nga si SCAA Namla ug ang hinigugma niini nga si Sheena nadakpan sa CIDG ug Sasa Police human nabawi gikan kanila ang pick-up sa gipatay nga negosyante ug nabawi-an pa ug armas.
Sumala sab ni Police Chief Inspector Levin Revira, kanhi hepe sa Sasa Police nga giduso na nila ang kasong carnapping ug illegal possession of firearms batok sa mga dinakpan.
