DAVAO CITY – Gibutyag ni Major. Ronnel Legarde, Task Force Davao spokesperson nga padayon sumala pa karon nga nakiglambigit si Task Force Commander Col. Consolito Yecla sa iyang mga counterpart sa kasikbit nga rehiyon kini aron masiguro nga dili makalusot dinhi sa dakbayan sa Davao ang mga tawo o grupo nga adunay dautan nga plano.
Aduna pa gihapon kini kalabutan sa ulahing panghitabo sa Tulunan, North Cotabato diin mibusikad ang usa ka eksplosibo nga hinungdan sa pagkamatay sa usa ka indibidwal ug gika-angol sa pipila sab ka mga biktima.
Gawas niini nakiglambigit na sab karon si Col. Yecla sa kadumalahan sa Davao City Overland Transport Terminal (DCOTT) aron nga pahinumduman ang mga bus drivers nga likayan ang pagpasakay ug mga pasahero sa gawas sa terminal nga maoy sagad delikado ug pahimuslan sa mga terorista.
Laraw sab niini nga masigurong luwas nga makaabot sa ilang destinasyon ang mga pasahero.
