DAVAO CITY – Bisan nga gisugdanan na ang pag-scan sa mga DQR code sa mga checkpoint ning siyudad partikular na sa Sirawan Toril, Lacson ug Calinan ning dakbayan sa Davao, aduna pa gihapoy gipalusot ang mga nahisgutan gumikan sa pipila ka mga konsiderasyon apan gisubay pa gihapon ang uban pa nga mga rekisitos nga gikinahanglan nga i-presenta.
Apan laoman sumala pa nga pahugtan na ang pag-scan sa QR code sa higayon nga mahan-ay na ang tanan sa umaabot nga mga adlaw.
Kahinumduman nga gawas sa Food and Medicine Pass, usa na sab ang DQR sa mga gikinahanglan nga i-presenta sa higayon nga molatas sa mga checkpoint o mosulod sa mga establisyemento kini aron nga dali na lamang ang ipahigayon nga contact tracing sa higayon nga adunay mga nakahimamat nga mga posibleng nagpositibo sa covid-19.
Sumala pa kang Col. Consolito Yecla, commander sa Task Force Davao, nga wala silay nasinatian nga suliran dihang gisugdan ang pag-scan sa mga QR code.
Gikanayong anaa sa 30 ka mga cellphone ang gi-isyu sa lokal nga kagamhanan ngadto sa TFD aron maoy gamiton sa pag-scan sa DQR.
