DAVAO CITY – Gihagit ni Davao City Mayor Sara Duterte-Carpio ang Task Force Davao nga himuon ang zero terror incident sa siyudad sa mosunod nga napulo ka tuig.
Tipik lamang ang pahayag sa Mayor atol sa gipahigayon nga ika-15 nga anibersaryo sa TFD nga gihimo sa ilang headquarters sa Sta. Ana Pier.
Gidayeg sa Mayor ang nahimong pagpaningkamot sa TF Davao troopers aron lamang nga mapabilin ang kahusay ug kalinaw sa siyudad.
Ang nahisgutan nga selebrasyon adunay tema nga “Kinse ka tuig nga matinud-anong nag-alagad sa mga Dabawenyo.
Una ng gimugna ang task force kaniadtong tuig 2003 human ang sunod-sunod nga bombing incidents sa Davao airport ug Sasa Wharf.
Gitataw sab ni Mayor Inday nga suwerte sumala pa ang Dabawenyos gumikan kay wala silay nadawat nga reklamo sa pagpangabuso nga giduso batok sa Task Force Davao.
Samtang pipila sa mga gipasigarbo ni TFD commander Colonel Nicolas Mempin nga nahimo sa ilang han-ay mao ang malampuson nga pagkasikop kang Cayamora Maute ang amahan sa napatay nga si Abdullah Maute, leader sa terrorist Maute group, kaniadtong Hunyo 6, 2017.
Gawas niini nakasikop sab sila ug pipila ka mga indibidwal nga nalambigit sa ginadili nga droga nga nadakpan atol sa mga gipahigayon nga aktibidad sa dakbayan ug sukad nga gipatuman ang Martial Law dinhi sa Mindanao.
