Gipasakay na ang gipalagpot nga kongresista nga si Arnulfo Teves Jr. sa usa ka eroplano nga mobyahe dinhi sa nasud human nga gipa-deport kini sa Timor Leste. Subay sa gipaguwang pamahayag sa mga otoridad sa Timor Leste nga sakyan ni Teves sa pagpauli sa Pilipinas ang eroplano sa Philippine Airforce.
Alas 2:41 oras dinhi sa nasud milupad na ang eroplano nga gisakyan sa giisip nga mastermind sa kamatayon ni kanhing Negros Oriental Gov. Roel Degamo niadtong 2023. Sa hulagway nga gipakita, nakaposas ang mga kamot ni Teves samtang ang iyahang mga tiil gikadenahan aron dili makadagan. Daghan usab ang mga nag-alirong sa nahisgutan nga mga opisyal sa Imigration sa Timor Leste. Samtang,andam motabang ang Philippine National Police (PNP) sa Department of Justice (DOJ) kung mobalik na sa nasud si kanhi Negros Oriental 3rd District Representative Arnolfo Teves Jr.
Matod ni PNP Chief Gen. Rommel Marbil, nga andam gilayon ang PNP nga motabang kung makasulod na sa Pilipinas si Teves. Gawas sa mga PNP escorts, giandam na usab sa kapulisan ang ilahang custodial facility alang sa posibleng pagpahimutang kang Teves.Kahinumduman nga sa kaadlawon sa Martes gidakop si Teves sa iyang balay sa Dili, Timor-Leste. Una ng gibutyag sa gobyerno sa Timor Leste nga ilahang gipa-deport si Teves tungod kanselado na ang iyahang pasaporte.
