Gikabutyag nga daghan ang gustong mupatay sa testigo sa pagpatay kang retired general ug kanhi Philippine Charity Sweepstakes Office (PCSO) board secretary Wesley Barayuga niadtong Hulyo 2020.
Gipahayag ni Philippine National Police (PNP) Chief General Rommel Marbil, gipailalom na si Lt/Col. Santi Mendoza sa ilahang kustodiya aron mahatagan kini ug proteksyon batok sa mga gustong motudas kaniya.
Kung kahinumduman si Mendoza ang mi-atubang sa quad committee sa kamara niadtong Septyembre 27 ug gilambigit si kanhi PCSO General Manager Royina Garma ug Napolcom Commissioner Edilberto Leonardo sa pagpatay kang Barayuga.
Ang motibo sa pagpatay mao ang pagkontra kuno ni Barayuga sa pagpalapad sa operasyon sa Small Town Lottery (STL) ug Perya ng Bayan, kung diin ang prangkisa ang nakorner sa mga police officers nga kabahin sa Philippine National Police Academy Class 96.
Si Mendoza ang gitanggal sa Philippine Drug Enforcement Group (PDEG) gumikan sa partisipasyon niini sa pagpatay kang Barayuga, apan gumikan kay daghan kini ug nasayran, gimando ni General Marbil ang paghatag ug proteksyon sa testigo.
Nahilakip kuno sa kasuhan sa PNP ang mga opisyal nga nagtabon sa mga tawo nga adunay kalabutan sa pagpatay kang Barayuga.
Sa pagkakaron, nagpadayon ang pagpanguha ni Brig. Gen. Nicolas Torre III, bag-ong pangulo sa Criminal Investigation and Detection Group (CIDG) ug dugang ebidensya aron makasuhan ang mga nalambigit sa pagpatay kang Barayuga.
