DAVAO CITY – Ginatun-an pa sa Davao City LGU nga amyendahan o di kaha wagtangon na ang Test Before Travel Ordinance, kon ang mandatory COVID-19 testing bag-o makasulod sa Dakbayan pinaagi sa Davao International Airport.
Sumala sa nagduso niini nga si Konsehal Mabel Sunga-Acosta, nagapadayon pa ang diskusyon sa COVID-19 Task Force sa Dakbayan aron bag-uhon ang mga probisyon sa ordinansa o di kaha wagtangon na kini karong padayon nga nagaubos ang mga kaso sa COVID-19 sa Dakbayan ug sa nagapadayong vaccination rollout.
Dugang niya, ginatun-an og maayo sa lokal nga kagamhanan ang maong lakang ug uban pa nga ginapatuman niini sa kasamtangan.
Samtang wala pay pinal nga desisyon kalabot niini, nagapabilin gihapon ang 72-hour negative RT-PCR test result alang sa mga biyahero nga musulod sa Davao International Airport.
Dugang pagpaklaro sa City Tourism Operations Office, kinahanglang magsumite sa nasangpit nga requirement ang tanan, bisan pa man fully-vaccinated na sila batok COVID-19.
