Gibatikos ni Ombudsman Jesus Crispin “Boying” Remulla ang ‘sayop nga impormasyon’ nga gipaambit ni Philippine Ambassador to the United Kingdom Teodoro Locsin Jr. kabahin sa giingong pagdakop kang kanhi Presidente Rodrigo Duterte.
Matud sa bag-ong Ombudsman, wala gi-kidnap ang kanhing presidente ug walay nahitabo usab nga paglapas sa legal nga proseso sa dihang gipadala siya sa Netherlands aron atubangon ang kaso nga crimes against humanity.
Kung balikan ang kontrobersyal nga pamahayag ni Ambassador Locsin, gibutyag niini nga wala gi-aresto sa International Criminal Court (ICC) ang kanhing presidente, ug imbis gikanayon niini nga gikidnap kini sa mga Pilipino dinhi sa Pilipinas ug gihatod sa mga langyaw.
Gihulagway pa kini sa kanhi Duterte appointee nga usa ka pagbudhi sa nasud.
Bisan pa niana, misukol si Ombudsman Remulla nga walay nahitabong kidnapping o illegal nga pagdakop.
Sa tinuod lang, matud niya, nasunod ang tanang legal nga pamaagi sa pagdakop hangtod nga gipadala ang kanhing presidente ngadto sa The Hague.
Kahinomduman nga niadtong tuig 2018, gitudlo ni kanhi Presidente Duterte si Locsin isip kalihim sa Department of Foreign Affairs.
Gipuli siya kang kanhi Sec. Alan Peter Cayetano nga niresign aron modagan isip kongresista.
