Nakahimo sa pagpatala ug world record ang usa ka batan-on sa Michigan, USA gumikan sa pagbaton niini ug dagkong mga kamot ug tiil!
Matod pa nga ang 16-anyos nga si Eric Kilburn jr. ang pinakabag-ong record holder sa titulong, “Largest Feet on a Living Teenager” gumikan sa tiil niini nga adunay sukod nga 13.5 inches.
Ang shoe size ni Eric ang size 23, dako kini kung ikumpara sa ordinaryong shoe size nga 8.5 hangtod 9.
Gawas sa nahisgutang titulo, nadawat usab ni Eric ang titulong “Largest Hands on a Teenager” gumikan sa sukod sa kamot niini nga 9.13 inches.
Gumikan kay dili ordinaryo ang gidak-on sa mga tiil sa batan-on, gikinahanglan pa niining magpahimo ug sapatos nga mahal usab ang kantidad.
Panahon sa tingtugnaw, gikinahanglan usab niini magpa-customize ug winter gloves.
Homan ma-feature sa TV ug mga news program si Eric, miduol kaniya ang mga iladong sportswear brand nga Puma ug Under Armour ug mitanyag ang mga nahisgutan nga isponsoran kini ug mga sapatos.
