DAVAO CITY – Subling mibati ug kabalaka ang mga taxi driver nga muhinay ang ilang pagpamasada karon nga mutaas na ang ilang plitihan pinasikad sa recalibrated nga metrohan.
Gituohan sa mga driver nga maabtan pa ug unom ka bulan ayha pa madawat sa mga pasahero ang taxi fare rate, labi na ang sa mosunod nga kilometrahe nga P13.50 ug ang P2.00 pesos nga running time.
Giklaro sa mga taxi driver nga dili gihapon sila mokita gikan sa bag-o nga taxi fare rate, gumikan kay gipatas-an sab sa mga operators ang singil sa arkila.
Dugang sab niini ang pagmahal sa presyo sa mga produktong petrolyo gumikan sa excise tax nga resulta sa Tax Reform for Acceleration and Inclusion (TRAIN) law.
Diskarte na lamang sa mga taxi driver nga pasabtgon ang mga pasahero ug dili na lamang patolan ang mga yawyaw ug bagolbol sa mga mosakay.
Sumala pa nila nga bisan pa kung mo-abot sa traynta pesos hangtud na sa singkwenta pesos ang madugang sa ilang pamasahe, mag-taxi lamang gihapon ang mga pasahero labi na kung dunay gi-apas nga biyahe.
Sa kwentada duna pay kapin kun kulang ka mga 5,500 ka mga taxi units ang wala pa napa-calibrate ang ilang metrohan.
