Gikinahanglan pa og pagtugot gikan kang Pangulong Ferdinand Marcos Jr. una mapagawas ang mga tax records ni Bise Presidente Sara Duterte ug iyang bana nga si Atty. Manases Carpio nga gisang-at isip ebidensya sa impeachment trial.
Sumala pa kang Atty. Kim Henares, kanhi Commissioner sa Bureau of Internal Revenue o BIR, naglatid ang Section 71 sa National Internal Revenue Code nga kinahanglan ang aprobasyon sa Pangulo aron masusi o ipagawas ang mga dokumento sa buhis. Matod pa ni Henares, adunay awtoridad ang BIR Commissioner nga mangayo og pagtugot gikan sa Pangulo alang sa pagpagawas sa maong mga rekord.
Dugang pa niini, iyang nahinumdoman nga sa impeachment trial ni kanhi Chief Justice Renato Corona, gipagawas ang income tax returns niini human siya mismo nangayo og aprobasyon gikan sa kanhing Pangulong Benigno Aquino III.
Kahinumduman nga nalambigit ang isyu sa pag-subpoena sa tax records ug bank records ni Bise Presidente Sara Duterte isip suporta sa mga alegasyon ilalom sa Article II sa Articles of Impeachment.
