DAVAO CITY – Gipaduso karon ngadto sa Kongreso ni Davao City First Congressional District Representative Paolo Duterte ang tax incentives ngadto sa mga volunteer doctors nga naghatag ug libreng dekalidad nga serbisyong medikal sa mga Pilipino.
Ilawom sa House Bill No. 5672, gikasugyot nga hatagan ug tax credits ang mga doktor nga naghatag ug pro bono kon libre nga serbisyo.
Sa pagmugna sa maong balaudnon kauban ni Benguet Representative Eric Yap ug ACT-CIS Partylist Representatives Edvic Yap ug Jeffrey Soriano, gidayeg ni Duterte ang mga doktor nga nagdalit sa ilang panahon ug serbisyo ngadto sa mga Pilipinong kabus, bisan pa man sa nagpahinabong pandemya.
Sumala sa pagbana-bana sa University of the Philippines, adunay 3.7 nga doktor sa matag dyes mil ka mga Pilipino.
Ubos kini sa gitagana sa World Health Organization nga usa ka doktor sa matag usa ka libo nga tawo.
Gikanayon sa kongresista, bisan pa man sa ubos nga ratio, gipili gihapon sa mga doktor nga manerbisyo nga walay bayad ilabi na sa mga lagyong dapit.
Sigun sab sa maong balaudnon nga susihon sa Department of Health ug Philippine Medical Association ang mga pro bono services nga gihatag sa mga doktor, lakip ang oras nga gigahin ug ang klase sa treatment nga gihatag ngadto sa mga pasyente.
Samtang magtagana sab ug mga rules and regulations ang BIR aron maimplementahan ang maong balaudnon.
Matud pa ni Duterte, madasig pa ang mga doktor nga ipadayon ang gisugdan nga libreng serbisyo kon mahatagan sila ug gilayong tax breaks.
via || Bombo LJF
