DAVAO CITY – Nagbutang ang tigdumala sa Davao City Overland Transport Terminal kon DCOTT og taripa alang sa mga porters kon mga kargador aron aduna nay basehan alang sa tukmang singilan sa mga kabtangan nga buot ipakarga sa mga pasahero.
Nagsugod ang pagpatuman sa taripa kaniadtong nakalabayng simana human kini giuyonan sa mga lehitimong porters sulod sa terminal.
Namugna ang maong taripa gumikan sagad sa mga ginaagulo sa mga mananakayay ang sobrang pagpasingil sa mga porter kanila.
Buot ipasiugda pag-usab sa DCOTT Management nga dili awtorisado ang tanang DCOTT Porter sa pag kolekta ug bisan unsa nga bayronon gikan sa mga pasahero.
Mamahimo lang sa pagbayad direkta ngadto sa gimuntar nga Officer-of-the-Day, nahimutang diha sa gawas sa Passenger Lounge area duol lamang sa entrada.
Kon ugaling masuta nga direktang nangayo ang porter ug singil, alayon kining i-report sa Civil Security Agents o dili kaha sa Public Assistance Counter sa entrada sa terminal hupot ang pangalan ug number sa porter nga nakabutang sa ilahang asul nga uniform.
via || Bombo LJF
