DAVAO CITY – Negatibo sa COVID-19 ang tanang 20 ka close contacts sa labing unang Delta Variant case sa lungsod sa Nabunturan, Davao de Oro.
Kini ang gibutyag ni Nabunturan Mayor Chelita Amatong pinaagi sa iyang Facebook post. Niadtong Sabado lang, Agosto 21, nahatag sa ilang buhatan ang resulta sa Reverse Transcription-Polymerase Chain Reaction kon RT-PCR test results sa 20 ka close contacts nga pulos negatibo tanan.
Gibutyag usab ni Amatong nga sa kasamtangan, wala pay natalang kumpirmadong local case sa Delta Variant sa ilang lungsod.
Ang unang kaso sa Delta Variant sa Nabunturan, usa ka Returning Overseas Filipino kon ROF nga gikan pa sa Cairo, Egypt.
Niabot siya sa Manila niadto pang Hulyo 18 ug gi-swab kini. Nagpositibo ang iyang swab test niadtong Hulyo 24 ug gilayong gi-quarantine sa Manila hangtod Agosto 3.
Miabot siya Davao International Airport niadtong Agosto 4 ug gi-isolate sa usa ka isolation facility sa Dakbayan sa Davao hangtod Agosto 8.
Gipahimangnuan ni Amatong ang iyang mga sakop nga mutuman sa mga health protocol ug likayan ang mga dili mahinungdanong mga lakaw karon nagapadayon pa ang COVID-19 Pandemic.
