DAVAO CITY – Gisaysay ni Davao City Police Office Acting City Director Senior Superintendent Alexander Tagum ang nahitabong duguon nga dispersal sa Kidapawan sa milabay nga tuig tali sa kapulisan ug mga raleyista nga mikalas ug pipila ka mga kinabuhi.
Matud pa sa opisyal nga hugot ang iyang nahimong pahimangno kaniadto sa iyang mga sakop nga dili mohimo ug lakang sama sa pagpanakit sa mga nag-protesta apan pipila sumala pa sa mga nahisgutan maoy namunal sa kapulisan samtang pipila matud pa sa mga raleyista ang dili lihitimo nga mga mag-uuma inay mga sakop sa rebeldeng New People’s Army (NPA).
Samtang luyo sa nahimong pahayag sa mga militanteng pundok nga ilang babagan ang pagtuboy kang Tagum nga molingkod isip DCPO director dinhi sa dakbayan, respetuhon sumala pa kini sa opisyal isip kabahin sa “freedom of expression”.
Hinuon kinahanglan pa gihapon niya nga himuon ang iyang trabaho ug gani andam pa nga mohatag ang kapulisan ug seguridad alang sa mga militante isip kabahin sa ilang mandato ug isip giilang mga pulis sa katawhan.
