DAVAO CITY – Nagpagula na sab karon ang lokal nga kagamhanan sa Tagum city ug mga guidelines kalabot sa mga lakang nga ipatuman atol sa paghinumdom sa kalag-kalag diin laoman sab ang pagdagsa sa mga tawo sa mga sementeryo.
Sumala pa sa City Economic Enterprise Office sa Tagum City, kinahanglan nga motamud ang mga residente sa mga guidelines nga ipatuman aron nga malimitahan ang ihap sa mga mobisita sa mga public cemeteries.
Sumala pa kang Economic Enterprise Manager Grace Terante nga sugod sa Oktubre 29 hangtud Nobyembre 7, 2021, pasirad-an ang tanan nga mga sementeryo sa siyudad samtang sa Oktubre 30 hangtud Nobyembre 2, 2021 ipatuman ang No Burial Schedule ug sa Nov.8, 2021 pataas abli na kini sa pagbisita.
Doble karon ang pagpaningkamut sa Tagum City aron lamang kapugngan ang pagtakod-takod sa kagaw ilabi na nga ubay-ubay na sab ang mga natakdan sa lugar.
Nanghinaut na lamang karon ang lokal nga kagamhanan sa Tagum nga pabiling matamud ug dili magmagahi ilabi na nga nagpabilin pa gihapon ang pandemiya.
Gipahimangnoan ang mga mobisita sa mga sementeryo nga likayan ang pagdala ug ginadili nga butang sama na lamang sa kutsilyo ug uban pang mahait nga butang alak ug daghanan pa.
Magpahimutang sab ug help desk ang kapulisan aron nga maakomodar kadtong adunay ipadangat nga mga reklamo.
