DAVAO CITY – Gibutyag ni Michelle Schlosser, Davao City Covid-19 Task Force nga gihisgutan na nila karon ang planong tagging o pagbutang ug mga sticker sa mga panimalay nga nakapailalom na sa pagbakuna.
Kahinumduman nga laraw sa maong lakang nga dali na lamang nga masubay ang mga residente nga nagpabakuna ug mapasabot sab ngadto sa uban nga nagduha-duha pa gihapon niini gumikan sa kahadlok nga mopailalom aron nga maangkon ang igong proteksiyon batok sa kagaw.
Kahinumduman nga nakadawat karon ug daghanan nga pagdayeg ang gihimo sa mga Barangay Lasang sa siyudad gumikan kay nagapahigayon sila ug tagging sa mga fully vaccinated nga mga residente.
Samtang nagpadayag sab ug iyang pagpasalamat si Schlosser human nga ubay-ubay na karon ang mga indibidwal nga buot nga magpabakuna ug adunay pipila ka mga indibidwal usab ang naga-walk in.
Laoman nga magpadayon na sab ang vaccination program human nga ubay-ubay na nga mga bakuna ang miabot karon sa dakbayan.
Daghanang mga vaccination site na sab karon ang gi-ablihan sa siyudad aron nga maka-akomodar ug mga buot magpabakuna.
