DAVAO CITY – Igo na lamang sa pagpatala sa buhatan sa Sta. Ana Police Station ang usa ka 42 anyos nga magpapatigayon human mabiktima sa pagpangawat sa iyang mga kabtangan sulod sa iyang sakyanan kagahapon sa hapon.
Naila ang biktima nga usa ka Wilbert Amoy Tan, 42 anyos, menyo, usa ka negosyante ug residente sa Purok Magsaysay, Barangay Labangal, General Santos City.
Saysay sa biktima nga alas 2:00 ang takna kagahapon sa hapon iyang gi-park ang iyang Kia Bonggo nga sakyanan, kolor puti sa Lizada St., kanto Ramon Magsaysay Avenue, ning dakbayan sa Davao ug migawas ug dunay bout suta-on sa nahisgutan nga dapi.
Apan sa iyang pagbalik nasuta na lamang niini nga nawala na sulod sa iyang sakyanan ang iyang sling bag, kolor itom nga naundan sa iyang drivers license, SSS card, BDO ug EUBTM card, ug daghanan pa nga mga mahinongdanon nga mga dokumento.
Nawagtang sab ang iyang kwarta nga gilakipan sa salaping Yen, ug P14 mil ka pesos nga didto sa nahisgutan nga sling bag nga nahimutang sa passenger side sa iyang sakyanan.
Nasayran nga na-abli na ang nahsigutan nga sakyanan bisan kung iyang kining gi-lock sa wala pa mibiiya.
Padayon ang pagsusi sa Sta. Ana PNP sa mga suspek sa pagpanglungkab sa mga sakyanan sa nahisgutan nga dapit.
