DAVAO CITY – Gi-andam na sa lokal nga panggamhanan ang itunol nga mga hinabang alang sa mga nabiktima sa sunod-sunod nga sunog kagahapong adlawa sa managlahi nga lugar.
Una insidente nahitabo pasado alas dose kagahapon sa udto sa Badjao community sa Seaside 2, Del Carmen Matina Aplaya ning siyudad. Una ng gibutyag ni Brgy. Capt. Tirunay nga nagsugod sumala pa ang sunog sa panimalay ni Famela Valentin gumikan sa nag-overheat nga electric fan.
Hinuon mihatag na sumala pa ug mga food packs ang lokal nga panggamhanan ngadto sa mga biktima nga kasamtangang gipahimutang sa covered court sa Barangay samtang ang uban anaa sa ilang silingan ug mga paryente. Anaa sumala pa sa 23 ang totally damage nga panimalay, usa ang partial samtang 33 ka mga pamilya ang apektado, 13 ka mga boarders ug renters.
Gibutyag sab sa opisyal nga nalisdan pagsulod ang mga sakop sa kabomberohan gumikan sa kahuot sa dalan pasulod.
Samtang laing sunog sab ang nahitabo ala una sa hapon sa Purok 3 Tibungco ning siyudad partikular na sa Rosario Villarta Building. Sa ulahing imbestigasyon nagsugod kini sa Rex Ukay-ukay kitchen diin sumala pa sa vendor posibleng ang nakalimtan nila nga niluto ang hinungdan sa sunog.
Gibana-banaang mukabat sa P800,000 ang kantidad sa kadaut diin lima ka establisyemento ang gilamoy, usa ka simbahan ug usa ka bonggo nga sakyanan. Pasado alas tres na hapon dihang gideklara ang fire out.
