DAVAO CITY – Napusilan patay ang taas nga opesyal sa rebeldeng kalihukan ug lain pang suspek nga mitinguha sa pag-ikyas gikan sa modakop nga mga tinugyanan sa balaod.
Naila ang mga napatay nga sila si Jay Mendoza alias “Pogs” ug kaubanan niini nga usa ka alyas “Ondoy” kinsxa nakigpinosilay ngadto sa mga tinugyanan sa balaod nga misulay sa pagtunol sa arrest warrants ngadto sa mga suspek nga nag-atubang sa daghanan nga mga ngilngig nga mga krimin.
Nasayran nga ang Laak Municipal Police inabagan sa 60th Infantry Battalion gikatakda unta nga mo-tunol sa upat ka mga warrants alang kang Mendoza kinsa nag-atubang sa kasong pagpatay, double murder with double frustrated murder, robbery in band, ug serious illegal detention sa dihang si Mendoza ug Ondoy mihimo sa pagpaboto sa ilang armas punting ngadto sa mga tinugyanan sa balaod nga nagsingabot pa lamang ngadto sa safehouse sa mga pinangita.
Kini ang hinongdan nga mibalos sab dayon ang mga tinugyanan sa balaod nga misangpot ngadto sa kamatayon sa dakponon nga si Mendoza ug Ondoy.
Nadiskobre sa mga otoridad ang patay nga lawas nila ni Mendoza ug Ondoy uban sa duha ka 45 caliber pistols, usa ka Uzi sub-machine gun uban sa magazine ug mga bala, usa ka fragmentation grenade, usa ka blasting cap, usa ka metro nga Detonating cord, ug usa ka mobile phone.
Si Mendoza ang responsable sa pagpatay sa duha ka mga opesyal sa kasundalo ug lain pang dese sais ka mga sundalo, ug mga PNP personnel, CAFGU Active Auxiliaries, ug mga kanhi rebelde sukad niadtong 2006 hangtud sa 2018.
Nahilambigit sab siya sa pagpangsunod sa mining equipment, mga sakyanan, ug opsena sa APEX mining sa Maco, Cimpostela Valley Province niadtong 2012; pag-atake sa Dasia Security Agency sa Tagum sa milabay nga May 2014; pag-atake sa Gov. Generoso Municipal Police Station ug pagdagit sa hepe sa kapolisan niadtong 2016; pagsunog sa mining equipment sa Banay-banay, Davao Oriental niadtong Enero 2018; ug daghanan nga mga extortion activities sa rehiyon.
Si Mendoza mao ang Deputy Secretary sa Guerilla Front 2, Sub-regional Committee 2, Southern Mindanao Command; sakop sab siya sa Executive Committee, SRC2, SMRC; ug head sa RSOG, SRC2, SMRC, samtang si Ondoy kalakip sa drug personalities ubos sa watchlist sa Laak PNP.
