DAVAO CITY – Nadakpan na ang suspek sa nahitabong pagpatay sa duha ka mga babaye sa Purok 1, Barangay 2A, Davao City,kagahapon sa buntag, Enero 4.
Wala pay baynte-kwatro oras sa dihang nadakpan ang suspek nga giilang si Marcial Gonzales, 52 anyos, byudo, nagpuyo sa Palo Singko, Brgy. Kapatagan, Digos City, Davao del Sur; apan nagtrabaho isip kargador sa bagsakan sa Magallanes ning dakbayan.
Nadakpan kini sa mga otoridad sa hinusang pwersa sa RMFB11, San Pedro PNP ug Digos PNP.
Subay sa report sa mga otoridad, miuli gilayon ang suspek nga si Marcial sa Kapatagan human sa nahitabong krimen.
Apan pakyas nga nakaikyas ang maong suspek kagahapon sa udto sa Bus Terminal human nga gipahigayon ang drag net operation ug gidala sa Digos PNP.
Una ng nanawagan ang mga otoridad sa San Pedro PNP sa mga nakaila sa suspek nga midunggab patay sa duha ka mga babae nga ang usa niini usa ka menor de edad nga makig-alayon sa mgha otoridad.
Samtang gibutyag sab ni PMaj. Marvin Hugos, Station commander sa San Pedro PNP nga wala narekober sa crime scene ang kutsilyo nga gigamit isip murder weapon.
Kahinumdumang napatay sa suspek ang mga biktima nga sila alyas Jess, 15-anyos; ug Cora Oral Ansagit, 20-anyos, usa ka single mom nga susamang mga residente sa Purok 10, Sitio Patagi, Datu Salumay, Marilog District ning dakbayan.
Nasuta pa nga nabuhat sa suspek ang krimen gumikan sa pagkalango sa ilimnong makahubog ug dungan sab sa kasaba sa mga biktima.
Pag-angkon sab sa suspek nga sila ang nagbayad sa kwarto nga girentahan sa mga biktima.
Una ng gibutyag sa mga silingan nga pasado alas sais ang takna sa buntag, mikanaug ang suspek gikan sa taas nga bahin sa panimalay nga iyahang girentahan, ug giangkon niini ang krimen, dungan sa pagsulti nga manawag sila ug 911 gumikan iyahang napatay ang mga biktima.
Samtang sumala sab ni Brgy. Kapitan Carlos Garcia nga walay record sa baranggay ang suspetsado, apan aminado kini nga naga-inom ug adunay mga higayon nga magromento ilabi pa ug kung kini mabikil sa iyahang mga kauban.
Hustisya ang panawagan sa mga kabanay sa mga biktima nga matud pa, dili kumbinsido nga kalisang ang usa sa mga motibos sa suspek sa pagpatay sa duha ka babaye.
Sa pagkakaron, giproseso na sa mga kabanay ang pagpahimutang sa patay’ng lawas sa mga biktima.
