DAVAO CITY – Padayon karon ang pagpangita sa otoridad sa usa ka 27 anyos nga lalaki nga maoy suspek sa pagpanigbas patay sa magtiayon kagahapong adlawa sa Purok 2,Brgy. Napunggas, Asuncion probinsya sa Davao del Norte.
Sa impormasyong gipagawas sa Kapulisan sa Asuncion, Davao del Norte, giila ang misibat nga suspek nga si Jojo Luardo, 27 anyos, gikaingong kabanay ra matud pa sab sa mga biktima. Giila sab sa kapulisan ang magtiayong biktima nga sila Herminigildo Barbosa, 65 anyos, usa ka mag-uuma ug ang asawa niini nga si Antonia Barbosa, 68 anyos.
Subay sa imbestigasyon, nasayran nga nawalang sundang ang tinubdan sa maong away. Diin, miadto matud pa ang mga biktima sa balay sa suspek ug didto gipangitaan sa sundang. Apan kalit lamang kining misantop sa init nga panaglalis nga miresulta sa pagpanigbas sa suspek ngadto sa mga biktima. Naka-angkon og daghanang samad tinigbasan ang mga biktima sa nagkadaiyang parte sa ilang kalawasan ingon man sa liog nga miresulta sa ilang hinanaling kamatayon. Gihaya na sa Escriba Funeral Home ang patay’ng lawas sa mga biktima.
