DAVAO CITY- Padayon karong ginapangita ang suspetsado sa pagpangluba-patay sa usa ka mag-uuma sa Brgy. Tamugan, Marilog District, ning dakbayan atong adlawng miyerkules sa gabii.
Kahinumduman nga tulo ka adlaw pa gikan sa maong insidente nakaplagan ang patayng lawas sulod sa usa ka farm sa nasangpit nga lugar.
Sa imbestigasyon sa mga otoridad, giila ang biktima nga si Roy Amulong, 41 anyos, residente sa Sitio Mapawa, Maragusan, Davao De Oro.
Nasayran nga samtang nag-inom ang biktima uban ang kaubanan niini sa trabaho nga giilang si Mark Sabuan, 20 anyos, Sitio Pigalungan, Brgy. Tamugan, ning dakbayan, nagkalalis matud pa ang duha hinungdan nga nakahigayon si Mark sa pagluba sa biktima atol sa iyang pagkatulog.
Human sa maong panghitabo, gilayong gilubong sa suspek ang biktima sa luna nga gipanag-iyahan ni Ronelo Celez.
Apan dakong katingad-an usab sa mga residente sa maong dapit ang pagkahanaw sa mga kabtangan sa biktima susama na lamang sa cellphone ug kwarta niining nagkantidad og P6,000.
Gumikan sa maong insidente, pipila ka mga kaila sa biktima ang nasubo gumikan maayong tawo matud pa si Roy ug dali nga maduolan.
Sa karon, kalakip sa ginalantawan nga anggulo sa mga kapulisan mao ang pagpanulis apan padayon pa ang imbestigasyon kabahin sa maong pangitabo kalakip na ang pagpangita sa suspek aron sa pagtubag sa maong krimen.
