Nadakpan sa kapulisan ang usa sa mga suspetsado sa pagpamusil pasado alas 6:00 sa buntag kagahapong adlawa nga nahitabo sa Barangay Dongan Pekong, Matanao, Davao del Sur atol sa gipahigayon nga hot pursuit operation sa Sitio Atgas, Barangay Abnate, Kiblawan, Davao del Sur.
Subay sa report sa kapulisan nga ang biktima giila nga si Betong Labuayan Masukat. Nasayran nga naigo atol sa pagpamusil ang biktima sa likod ug kritikal ang kahimtang niini human kini nakahiagom og samad pinusilan sa duha ka mga suspetsadong lalaki nga giila nga sila si Jay-Ar ug Jenel.Sumala pa sa imbistigasyon nga human sa pagpamusil, dali nga misibat ang mga suspetsado. Gilayon nga naglusad og hot pursuit operation ang kapulisan nga gipangulohan ni Matanao MPS chief PMAJ Jeffmar T. Tercero, nga miresulta sa pagkasikop sa usa sa mga suspetsado nga nailhan nga si alyas Jay-Ar.
Lakip sab nga nadakpan ang iyang igsoon nga nailhan sa alyas nga Bert human kini masakpi nga naggunit og improvised nga 12 gauge shotgun. Samtang nagpadayon pa ang pagpangita sa kaubang suspetsado sa pagpamusil. Dugang pa sa imbestigasyon, kasuko o personal nga panagbangi ang gitumbok nga motibo sa maong panghitabo.
