DAVAO CITY- Nangayo karon og pasaylo ang suspek sa nagdunggab-patay sa kauban niining traysikad drayber sa Prk Sto. Niño, Barangay Leon Garcia, ning dakbayan atong nakalabayng adlawa.
Sumala pa sa suspek nga si alyas Randy, 50 anyos, nga nakainom matud pa silang duha niadtong higayona kung asa nahitabo ang krimen.
Apan isip pagdepensa ni Randy, nabuhat matud pa niya ang krimen human gi-unhan og sumbag sa biktima nga giilang si alyas Noel, 45 anyos ang iyang nawng samtang natulog.
Gumikan niini, mibalos ang suspek ngadto sa biktima pinaagi sa pagkuha og kutsilyo og deritsong gidunggab ang si alyas Noel.
Pagpaklaro pa sa suspek, walay basehan ang pagkulata kaniya sa biktima sanglit wala matud pa silay gilalisan.
Hinoon, gikanayon sa suspek nga andam kini moatubang sa kasong ipasaka kaniya aron sa paghatag og hustisya sa kamatayon ni Alyas Noel.
Ning kasamtangan, gina-andam na ang kasong murder nga ipasaka sa suspek.
Gipahinumduman sab karon sa mga otoridad ang katawhan nga dili magpalabi sa pag-inom og ilimnong makahubog ug likayan na lamang ang pakig-inom sa mga nakabangi nga indibidwal aron malikayan ang susamang insidente
