Padayon karon ang gihimong hot pursuit operation sa mga otoridad sa suspetsado nga mipusil sa usa ka babae nga tindera og bingka sa dakbayan sa Digos.
Subay sa report gikan sa Digos PNP, human sa nahitabong pagpamusil dali nga mibiya ang wala mailhi nga suspetsado.
Sa imbistigasyon sa kapulisan, pasado alas Tres sa kaadlawon nahitabo ang pagpamusil ngadto sa biktima nga si alyas “Mar-Mar” hamtong ang panuigon samtang anaa kini sa Bingkahan sa Barangay Tres de Mayo , sa dakbayan sa Digos, Davao del sur.
Sumala pa sa mga nakasaksi nga kalit lamang nga miduol ang wala mailhing suspek og gilayon nga gipusil ang biktima sa iyahang tiyan.
Dali usab nga gidala sa balay tambalanan ang biktima sa mga emergency responders ug padayon karon nga giatiman sa mga Doctor.
Ginasubay na usab sa mga otoridad ang mga nakamontar nga CCTV sa nasampit nga lugar o sa unahan nga bahin nga posibling gi-agihan sa suspetsado aron matumbok kini sa mga otoridad.
Padayon pa usab karon ang gihimong imbistigasyon, ilabi na ang motibo sa pagpamusil.
