DAVAO CITY – Nisukol sa mga otoridad ang suspek nga si Nico Medel Castaretas alyas “Cocoy” human nasakpan kining nagbaligya ug ilegal nga droga nga nagresulta sa iyang kamatayon.
Subay sa report, nagpahigayon ug buy-bust operation ang mga sakop sa Tugbok Police sa Purok 20, San Roque, Barangay Mintal, Tugbok District, Davao City sa miaging adlaw.
Atol sa operasyon, positibong napalitan sa mga poseur buyer ang suspek ug usa ka pakete sa gidudahang shabu.
Dihang kamatikud na si alyas “Cocoy” nga pulis diay ang iyang gibaligyaan, nakahigayon pa kini ug bunlot sa iyang pistola ug gipabuto niya kini ngadto sa mga otoridad.
Mibawos sab ang mga otoridad ug pagpusil kaniya sa dihang naigo ang suspek ug nakahiagum ug samad pinusilan sa lawas.
Gisulayan pa ug dala sa balay tambalanan apan nakabsan sa kinabuhi ang suspek.
Nasignit gikan sa suspek ang unom ka pakete sa gituuhang shabu, improvised tooter, buy-bust money, usa ka kalibre punto trentay otso na revolver ug upat ka mga buhing bala.
via || Bombo LJ Florendo
