DAVAO CITY – Nag-atubang na ug kaso ang usa ka lalaki nga gikanayong nangmolestiya sa onse anyos nga batang babaye.
Girekomenda ni Prosecutor Erna P. Orilla-Donasco nga pasakahan ug kaso ang suspek nga si Bernabe B. Onen ilalom sa Republic Act 8385 (Anti-Rape Law) ingon man acts ilalom sa Republic Act 7610 (Child Abuse).
Gihukman si Onen subay sa nahimong pahayag sa biktima nga wala hinganli nga gipugos sumala pa siya pag-adto sa balay sa suspek diin nahitabo ang pagpangmolestiya kaniya.
Gani nadunggan pa niya nga gipangita siya sa iyang higala apan gitabunan sumala pa ang iyang baba ni Onen.
Mikuha matud pa ug sundang ang suspek ingon man higot hinungdan nga mibati ANG biktima ug kahadlok sa pagtuo nga patyon siya niini.
Dihang gibuhian sa akusado, gilayon nga misumbong ang minor de edad ngadto sa iyang inahan hinungdan nga nagpatala gilayon sila sa kapulisan nga maoy hinungdan sa pagkasikop kang Onen.
Gitino sa prosecutor nga ang gihimong warrantless arrest sa otoridad ngadto sa suspek ang balido gumikan kay gihimo ang lakang human mismo ang pagpangmolestiya.
Gitataw sab sa biktima nga dili lamang kini ang unang insidente nga gimolestiya siya sa suspek gumikan kay kaniadtong anaa pa lamang siya sa Grade 1, hulaton sumala pa siya niini human sa iyang klase ug pugsanon nga dad-on sa ilang panimalay.
Gihatagan ang akusado ug napulo ka tuig aron mosumite sa iyang counter-affidavit.
