DAVAO CITY – Giisip sa mga survivor sa dakung sunog sa Santo Niño, Agdao Proper, ning dakbayan sa Davao nga ikaduhang kinabuhi na ang ilang nahoptan human nga nakalingkawas sa nagdila-ab nga mga balay.
Si Baning Sam, security guard sa warehouse wala na gayud magtuo nga maluwas pa siya human nga gilamoy sunog ang dos andans niyang gi-abangan nga balay.
Atol sa iyang pag-ikyas gihubo na lamang niya ang iyang pantaloon nga nadutlan na sa kalayo.
Nabitay pa siya atol sa iyang paglukso.
Nagkasamad-samad siya sa iyang pag-ambak gikan sa nagdilaab nga balay.
Samtang si Shiela Mae Malicar, kauban sa balay ni Baning Sam wala na gayud magdahum nga subli pa niya nga igkita ang kauban sa balay nga dugay sab nga nakagula.
Nagkapaso-paso si Shiela gumikan kay gidasmagan niini ang nagdilaab nga pultahan sa gi-abangan nga balay.
Nagpakitabang ang mga biktima gumikan kay ugdaw ang tanan nila nga mga gamit, lakip na ang mga mahinongdanon nga mga dokumento.
