DAVAO CITY – Gikatakda na sab nga ablihan sa Southern Philippines Medical Center (SPMC), ang usa sa mga referral hospital sa COVID-19 ang ilang surgical services sayo sa bulan sa Hulyo human nga ila kining temporaryo nga gihunong sukad kaniadtong bulan sa Marso.
Sumala pa kang Dr. Ricardo Audan, Chief of Clinics ug Health Emergency and OIC SPMC chief, ang desisyon nga subling ablihan ang surgical department ang nasabutan sayo sa milabay nga semana.
Una na matud pa nga nga giplanohan ang pag-abli niini sa Hulyo 1 apan posibleng isibog kini sa Hulyo 8.
Sa kasamtangan, gisagop sa surgical department ang mga protocols ug guidelines alang sa pasyente ug mga doktor nga magpahigayon ug surgery, aron malikayan ang risgo sa pagkatag sa covid-19.
Gitino ni Audan nga ang mga walk-in patients dili sumala pa i-admit kung walay prior appointment sa balay tambalanan alang sa schedule sa ilang surgery.
Hatagan sumala pa ug prayoridad sa balay tambalanan ang charity patients. Apan ayha ang surgery, kinahanglan nga mopailalom una ang pasyente sa 14-day home quarantine ingon man sa reverse transcription-polymerase chain reaction (RT-PCR) test sa ika 15 nga adlaw.
Ang mga magpositibo sa COVID-19 dili sumala pa kwalipikado sa operasyon inay ipahimutang kini sa isolation facility. Gikanayong ang RT-PCR test, libre alang sa mga pasyente gawas lamang sa pagbayad ug 750 pesos alang sa personal protective equipment (PPE). Kalakip sab sumala pa sa mga mopailalom sa RT-PCR tests ang mga doktor.
