Gipasalig ni Pang. Ferdinand Marcos Jr. nga igo ang suplay sa lana sa Pilipinas sulod sa dul-an Kwarentay singko ka adlaw bisan pa sa kabalaka sa global supply.
Matod sa Pangulo, walay rason nga mabalaka o mag-panic ang publiko. Gihatagan sa Pangulo ang Department of Energy sa tahas nga susihon ang kasamtangang imbentaryo sa diesel, gasolina, kerosene, ug jet fuel, ug siguruhon ang padayon nga pagpangita og dugang supplier.
Mibutyag usab ang Pangulo nga dili pa klaro kung unsa kadugay nga maapektuhan ang suplay gikan sa Middle East, busa padayon ang koordinasyon sa gobyerno sa mga supplier ug partner countries.
Gipasalig usab ni Marcos nga motamod sa mga mipatigbabaw nga kontrata sa pag-import sa lana aron masiguro ang hapsay nga pag-abot sa suplay sa Pilipinas.
Aminado usab kini nga sa sinugdanan lisod sa mga supplier ang paghatag og detalye tungod sa kawalay-kasiguruhan, lakip ang presyo.
Bisan paman niana, hinay-hinay nang nagaayo ang agos sa suplay human sa padayon nga koordinasyon ug pagpangita og alternatibong tinubdan nga dili apektado sa kagubot sa Middle East.
