Gipasalig sa Department of Energy (DOE) nga igo ang supply sa LPG sa Pilipinas bisan pa sa padayon nga taas nga presyo sa krudo sa nasud.
Sa press briefing sa Malacañang, gibutyag ni Energy Secretary Sharon Garin nga bisan pa man og mihunong sa pag-export ang pipila ka dagkong producer sa LPG, nakapangita dayon og alternatibong suplay ang gobyerno ug mga kompanya sa lana sa Pilipinas.
Importante kini, matud pa niya, kay dili lamang sa panimalay gigamit ang LPG kondili usab sa mga negosyo sama sa mga restawran.
Gawas sa China ug Hong Kong, nakapangita usab og supplier ang mga kompanya hangtod sa Australia ug Estados Unidos, ug sa pagkakaron nakakuha na og suplay ang nasud gikan niini.
Bisan og dili pa komportable ang gidaghanon sa suplay, nagpadayon sa pagpangita og solusyon ang Philippine National Oil Company (PNOC), lakip ang plano sa pagpalit og usa ka vessel aron matabangan ang mga kompanya ug mapalig-on pa ang suplay sa LPG sa nasud.
