Gisaka ngadto sa ikatulong alarma pasado alas Singko sa buntag ang nahitabong sunog sa Purok 22, Malamboon, Ecoland, Brgy. 76-A, Bucana ning dakbayan sa Davao pasado alas Tres ang takna kaganihang kaadlawon.
Subay sa inisyal nga impormasyon sa mga otoridad, gibana-banaan nga anaa sa gatusan ka mga panimalay ang nadanyos atol sa maong panghitabo.
Atol sa paghinabi sa mga biktima sa sunog gikan sa magsuong Gindulan, sumala pa sa mga nahisgutan nga nakamata na lamang sila sa aso nga misulod sa ilahang gi-abangan nga panimalay gumikan sa nahitabong sunog.
Dali usab nga mikuyanap ang kalayo tungod kasagran sa mga panimalay gama sa light materials.
Sa pagkakaton, nagpadayon pa angf gihimong imbistigasyon sa mga kabomberohan aron masuta ang hinungdan sa pag-ulbo sa kalayo.
Ginasubay na usab ang kinatibuk-an nga danyos atol sa maong panghitabo.
Nadeklara usab nga fire under control pasado alas-Sais sa buntag.
Sa laing bahin ang mga biktiman ang gipahiluna na sa usa ka covered court sa nasampit nga baranggay. Kahinumduman nga adunay nahitabo usab nga sunog niadtong adlaw nga Dominggo nga miugdaw usab sa 19 ka mga panimalay sa Punta Dumalag 3, Brgy. Matina Aplaya ning syudad sa Davao.
