Mokabat na sa kinatibuk-ang 148 ka mga insidente sa sunog ang natala sa dakbayan sa Davao sukad pagsugod sa tuig 2026, sumala sa inisyal nga datos gikan sa Davao City Fire District.
Subay sa rekord, 78 ka insidente ang natala niadtong bulan sa Enero, samtang 57 usab ang nadugang niadtong Pebrero.
Sa pagsulod sa bulan sa Marso, 13 ka kaso na ang narehistro, samtang wala nalakip ang sunog nga nahitabo sa Brgy.36-D, kagahapong adlawa.
Gipadayag sa mga otoridad nga mas dako ang ihap sa mga sunog sa unang duha ka bulan sa tuig, hinungdan nga gipakusgan ang kampanya niini sa pagpahinumdom sa publiko mahitungod sa fire safety.
Kadaghanan sa mga insidente giingong naggikan sa electrical faults, napabay-an nga kandila, ug open flame sa sulod sa kabalayan.
Nanawagan sa Bureau of Fire Protection sa mga residente sa Davao City nga magbantay kanunay, sigurohon ang hustong pag-instalar sa mga linya sa kuryente, ug likayan ang mga butang nga posibleng hinungdan sa sunog.
Samtang nagpadayon ang kampanya batok sunog, naglaum ang mga otoridad nga mokunhod ang ihap sa mga insidente sa mosunod pang mga bulan pinaagi sa kooperasyon sa komunidad ug estriktong pagsunod sa fire safety measures.
