DAVAO CITY – Nakatala ang Davao City Fire District og P31 milyones pesos nga danyos sa mga naugdaw nga tungod sa sunog sa unang tulo ka bulan sa tuig 2023.
Gikanayon sa tigpamaba sa buhatan nga si Senior Fire Officer 4 Ramil Gillado, mas taas kini og otso milyones pesos kon itandi sa susamang panahon sa nakalabayng tuig.
Sumala sab sa buhatan, nisaka sab ang ihap sa mga natalang sunog ngadto sa 77 diin katunga niini, mga grassfires ug mga kalit lamang nga pag-ulbo.
Nahilakip dinhi ang nahitabong sunog kaniadtong Pebrero 25 nga gikaugdaw sa nasa 1,200 ka mga kabalayan sa Barangay 22-C ug 23-C, Piapi Boulevard, ning dakbayan.
Namatikdan sa buhatan ang ubay-ubay nga pagsaka sa mga kaso sa sunog sa dakbayan bisan pa man sa taas nga kampanya sa BFP atol sa Fire Prevention Month.
Nagpadayon gihapon ang pagpahigayon og information campaigns alang sa kasayuran sa katawhan panahon sa sunog.
Nagpahimangno sab ang City Fire District nga ampingan ang balay panahon sa kwaresma og init nga panahon pinaagi sa pag-unplug sa mga appliances nga wala na ginagamit.
via || Bombo LJF
