DAVAO CITY – Patay ang usa ka sundalo, samtang angol ang lain pang duha human sa engkwentro batok sa New People’s Army (NPA) sa Compostela Valley Province ug Davao del Norte kagahapong adlawa.
Naila ang nabugtu-an sa kinabuhi nga mao si PFC Armand Campus, samtang angol sila si PFC Ruben Labaca, Jr. ug PFC Ralph Baldomar.
Atol sa operasyon sa kadundalohan na-recover nila ang mga high powered firearms ug improvised explosive device (IED) sa Lower Dalimdim, Naga Laak, padulong sa sitio Rizal, Pinansya-on, Camate District sa Asuncion, ug Barangay Sunlon, sa Asuncion, Davao del Norte.
Nasayran gikan sa kasundalohan nga nakasangka sa mga sakop sa 60th Infantry Batalion Philippine Army, 701st IB, ug 46th IB ang Pulang Bagani Command 4, Southern Regional Command sa rebeldeng New People’s Army.
Gihangyo sa opesyal ngadto sa mga residente nga ipahibalo gilayon kanila kung dunay makita nga samdon nga mga rebelde aron nga kapatambalan.
