Pito ka mga armas ug sisentay kwatro ka buhing ammunition ang naimbargo gikan sa usa ka sundalo nga paingon unta pa-Davao City kagahapon sa kaadlawon.
Nasangit sa gipahigayong Task Force checkpoint sa may Sirawan, Toril, ning syudad ang 26 anyos nga si Private First Class Mohammad Kasingsingan Kitig nga taga-Barangay Poblacion, Matalam, North Cotabato, ug nakadestino sa Civil Military Operation, Sixth Infantry Batallon sa Awang, Maguindanao.
Sumala pa sa inisyal nga impormasyon sa Toril Police Station 8, gimaneho sa maong sundalo ang usa ka gray nga Kia Optima nga dunay numerong AAP 1099 paingon Davao City.
Apan sa pag-inspeksyon, walay gipakitang dokumento.
Busa gidakop nila kini ug gikumpiska ang mga dagkong armas nga dala-dala sa maong sundalo.
Gitanggong na si Private First Class Kitig sa Toril Police Station nga mag-atubang sab ug paglapas sa sa Republic Act 10591 kon Comprehensive Dangerous Firearms and Ammunitions Regulations Act.
via || Bombo LJ Florendo
