DAVAO CITY – Gipanghimakak sa usa ka agricultural company nga Sumifru nga sa ilaha nagagikan ang mga pinya nga gikatahong nag-unod og pestisidyo nga gikadaot sa mga residente duol sa pinyahan sa Brgy. Tawan-Tawan, Calinan, ning dakbayan. Sumala pa sa pahayag, gipunting sa Sumifru ang ilang taas nga integridad ug etikal nga pamatasan sa natad sa agrikultura. Gipaklaro sab ni Melvin Languido, food safety, occupational safety and environment manager sa kumpanya nga wala sila’y gipanag-iyahan nga pineapple plantation sa dakbayan, taliwala sa gipagawas nga pahayag sa Interfacing Development Interventions for Sustainability kon IDIS. Kana human nigawas ang resulta sa pagduki-duki nga gilusad sa Wonjin Institute of Occupational and Environmental Health diin nasayran ang pesticide content sa mga urine samples sa mga residente duol sa pineapple plantation. Nahilakip sab sa mga pagtuon ang mga kasibit nga mga plantasyon sa pinya sama sa Davao Agricultural Ventures Corporation. Kahinumdumang unang gikabutyag sa maong pagtuon nga tulo sa mga ginabawal nga pestisidyo ang makit-an sa urine samples sa mga residente.
