DAVAO CITY – Giila sa kasundalohan nga usa ka matang sa propaganda ang sulat nga gipadangat sa mga rebeldeng New People’ Army (NPA) kang Davap City Mayor Inday Sara Duterte-Carpio.
Sa sulat nga gilagda-an ni Regoberto Sanchez gipasangil niini nga ang corrupt nga Armed Forces of the Philippines (AFP) mao ang misabotahe sa peace talks hinongdan nga gipa-undang kini ni Pangulong Rodrigo Duterte.
Hinoon sumala sab ni Major Ezra Balagtey, tigpamaba sa Eastern Mindanao Command Propaganda sa NPA ang pasangil nga dunay sekreto nga katuyo-an ang mga sundalo sa military operations niini.
Sumala pa kang Balagtey transparent ug dayag sa mata sa katawhan ang organisasyon ug operasyon sa kasundalohan, samtang ang sa mga rebelde wala masuta kung kinsa ang ilang mga lideres ug tinuod nga tumong.
Sumala pa kang Balagtey nga ang kasundalohan lamang ang tinuod nga nagtamod sa tawhanong katungod sa mga sibilyan, tandi ngadto sa mga rebelde nga gi-reklamo nga nagapanghasi ngadto sa mga residente sa kabukiran ug nagapang-extort sa mga negosyante.
Gi-tahod sa kasundalohan sa rehiyon ang tinguha ni Davao City Mayor Inday Sara Duterte nga makighinabi sa mga rebeldeng NPA alang sa kalinaw sa dakbayan isip localized peacetalks.
Sa milabay nga Pebrero lima ka mga sundalo ang napatay sa natigayon nga panagsangka tali sa mga rebelde sa Calinan.
