DAVAO CITY – Gikabutyag ni Davao Consumer Movement co-convenor Ryan Amper nga dili makatabang sa pagresolba sa dakong suliran sa kuryente sa Island Garden City of Samal ang gilaraw nga P1.5-billion submarine cable project sa Northern Davao Electric Cooperative kon NORDECO.
Dugang pa ni Amper, nagkinahanglan kini ug tumang pag-apbruba gikan sa mga ahensya sa gobyerno lakip na ang pagtugot gikan sa Energy Regulatory Commission, ug lokal nga panggamhanan sa Samal ug Pantukan, Davao de Oro.
Dugang pa nga wala sab naisyuhan og environmental compliance certificate gikan sa Environmental Management Bureau sa DENR bisan pa man gikanayon nga maghatud ug dakong epekto sa kinaiyahan ang maong proyekto.
Hinuon, mahatagan unta og prayoridad ang pag-ayo sa nagubang submarine cable kaniadtong Pasko nga mukabat lamang sa P10 million ang kantidad.
Gisugyot sa grupo nga magbutang na lamang og kable sa mismong itukod nga Samal Island-Davao City Connector nga mas barato pa og P200 million kon itandi sa pagbutang og 25-kilometer submarine cable system gikan Samal padulong Pantukan.
Kahinundumang nagprotesta ang mga konsumante sa NORDECO ning nakalabayng simana gumuikan sa daw dili maayong serbisyo ug mahalon nga singilan sa kuryente.
Giuyunan sab ni Davao del Norte Governor Edwin Jubahib ang pagprotesta sa katawhan batok sa NORDECO tungod sa kadaot nga hatod sab niini sa turismo sa isla ug sa tibuok probinsya.
Ang maong panawagan, nunot sa gisumitar nga balaod mahitungod sa gilaraw nga take-over sa Davao Light and Power Company sa franchise area sa NORDECO nga naglawig sa pipila ka bahin sa Davao del Norte.
via || Bombo LJF
