DAVAO CITY – Napalabang na sa unang pagbasa ang sugyot ordinansa nga nagtumong magmugna og usa ka Stroke Rehab Center diri sa dakbayan sa Davao.
Kini mismo ang gihingusgan ni Councilor Lorenzo Benjamin Villafuerte aron mapugngan ang pagdaghan sa kaso sa stroke sa syudad ilabi pa nga angat na sab ang panahon sa kapaskuhan. Subay niini, makig-alayon ang opisyal sa buhatan sa City Health Office ingon man sa Department of Health alang sa katukuran sa maong establisyemento nga nagtumong magtanyag og libre nga therapy services.
Nasayran nga ang Physical therapy ang nagkantidad og P500 ngadto na sa P1,500 matag session ug ang pinaka-barato niini ang nagkantidad og P150 matag session sa Southern Philippines Medical Center. Gibutyag ni Villafuerte nga sa dakbayan sa Davao, usa lamang ka center ang gahatag og libre nga physical therapy ning kasamtangan nga mao ang Kap Louie Physical Therapy Center nga mismong gipanag-iyahan sa konsehal nga nahimutang sa Barangay Calinan Poblacion. Gitukod ang maong center isip paghinumdom sa amahan niini nga si anhing Councilor Louie Villafuerte kansa nakabsan sa kinabuhi gumikan sa stroke. Sa pikas bahin, usa lamang sab ka Stroke Center ang anaa sa syudad diin nahimutang kini sa Tibungco ilalom sa ikaduhang distrito.
