Misaad ang state witness nga si kanhi Department of Public Works and Highways (DPWH) Undersecretary Roberto Bernardo nga iyang ibalik ang kinatibuk-ang P1 bilyon ngadto sa panudlanan sa nasud.
Kabahin kini sa restitution isip baylo sa iyang pag-apil sa Witness Protection Program (WPP) aron motestigo sa mga anomalya sa flood control projects. Nauna nang nakauli si Bernardo og kapin P500 milyon ngadto sa gobyerno.
Sa iyang pagtestigo sa bail hearing nila kanhi Senador Ramon Revilla Jr. ug sa iyang mga kaubana nga akusado sa kasong malversation sa Sandiganbayan, giangkon sa kanhi opisyal sa DPWH ang iyang papel sa giingong korapsyon sa mga proyekto, lakip na ang sa Pandi, Bulacan, ug mibutyag nga nagmahay siya sa iyang pagkalambigit sa sistema.
Mitestigo usab si Bernardo mahitungod sa tulo ka giingong milyones nga cash deliveries ngadto kang kanhi Senador Revilla niadtong 2024 ug 2025.
Iyang gisaysay nga nangayo kuno si Revilla og 25% nga commitment alang sa infrastructure projects, lakip na ang giingong ghost flood control project sa Pandi, Bulacan.
Sumala kaniya, gisugo siya sa kanhi Senador nga makiglambigit nila kanhi DPWH Secretary Manuel Bonoan ug sa nipanaw nga kanhi DPWH USec. Catalina Cabral aron maapil sa 2025 General Appropriations Act (GAA) ang proyekto sa Pandi, Bulacan.
