Makadawat ug hangtod P20,000 nga one-time service recognition incentive (SRI) ang mga kwalipikadong empleyado sa gobyerno karong tuiga.
Nahisubay kini sa Administrative Order No. 40 nga gipirmahan ni Pres. Bongbong Marcos isip pag-ila sa ilang dedikasyon ug serbisyo. Sakop niini ang civilian government employees, military ug uniformed personnel, ug mga kawani sa Executive, Legislative, ug Judicial branches.
Magsugod ang pamahagi sa SRI sa Disyembre 15.
Ang pondo alang sa SRI kuhaon gikan sa 2025 Personnel Services budget sa mga ahensya, o gikan sa MOOE kung gikinahanglan.
Alang sa GOCCs, gikan kini sa ilang corporate operating budgets.
Mahimo usab nga maghatag ug hangtod ₱20,000 nga SRI ang mga constitutional offices, Kongreso, ug Hudikatura, depende sa ilang PS budget.
Alang sa LGUs, lakip na ang mga barangay, ang kantidad ug pag-apruba sa SRI nagdepende sa kapasidad sa pondo og sa personnel services limit sa Local Government Code.
Gitugotan usab nga maghatag ug SRI ang Local Water Districts.
Kwalipikado ang mga empleyadong anaa sa serbisyo hangtod Nobyembre 30, 2025 ug adunay dili moubos sa upat ka buwan nga serbisyo; pro-rated ang kantidad alang sa mga kulang niini.
Samtang, mohatag usab og year-end gratuity pay nga hangtod P7,000 sa mga kwalipikadong contract of service ug job order workers sa gobyerno, isip pag-ila sa ilang mahinungdanon nga kontribusyon.
Subay kini sa Administrative Order No. 39 nga gipirmahan ni Pang. Bongbong Marcos.
