DAVAO CITY – Gitambagan ni Covid-19 Vaccination program head Dr. Josephine Villafuerte ang mga ginikanan nga dungan sa gikatakda nga roll out sa bakuna alang sa mga nag-edad ug 5 ngadto na 11 anyos sa mosunod nga semana, kinahanglan matud pa nga i-rehistro una kini sa SafeDavao QR (DQR) Code.
Mahinungdanon matud pa kini aron adunay vaccination record ang bata.
Gawas niini, kinahanglan sab nga magpa-rehistro gumikan kay kabahin kini sa DQR ordinance sa siyudad diin tanan nga mga residente sa bisan unsa man nga edad kinahanglan nga mokuha ug kaugalingon nga QR code.
Dinhi sa dakbayan, pipila sa mga balay tambalanan nga mupartisipar sa pediatric vaccination ang gilangkuban sa Southern Philippines Medical Center (SPMC), Davao Doctors Hospital (DDH), DMSF Hospitals, ug Seamen’s Hospital.
Wala pa sab karon mikumpirma kung makighiusa sa nahisgutan nga roll out ang Brokenshire Hospital ug Metro Davao Medical and Research Center (MDMRC).
